O novo curso político comezou con dificultades para o goberno que dirixe Antonio Araúxo. Pasou máis dun ano desde a toma de posesión e segue en minoría. As negociacións cos posibles socios de goberno, o grupo socialista, están rotas. O PSOE convertiuse así nun membro máis da oposición que rexeita habitualmente as propostas dos nacionalistas. A pesares de todo, o rexedor de Gondomar non tira a toalla. Amósase seguro da súa capacidade de xestión. Como el mesmo di, é máis doado acadar unha forte inversión por parte da Xunta que uns poucos miles de euros para tarefas cotiás se é o pleno o que os tén que aprobar.
-Cal é o balance deste primeiro ano no goberno?
-Moi positivo, tanto no plano persoal como no político. A cidadanía percibe un cambio cun alcalde ao pé do canón, que atende a xente, e un goberno que fai as cousas fóra dos circuitos clientelares e que acode ás outras administracións con proxectos debaixo do brazo. Pese ás dificultades e aos paus nas rodas, o goberno foi quen de xestionar cerca de 7 millóns de euros en investimentos. Iso demostra que temos capacidade de xestión. Non está mal para un alcalde mileurista que cobra 2.900 euros ao mes e adica gran parte do seu salario aos gastos de xestión dos concelleiros porque a oposición os mantén sen soldo.
-Como se repartiron eses recursos?
-Desde o novo centro de saúde, que pasa dos 2 millóns de euros, ata un pequeno parque na Portavedra que fixo a Consellería de Medio Rural despois de 20 anos de reclamacións dos veciños. Polo medio houbo unha partida de 500.000 euros para o plan sectorial do polígono industrial da Pasaxe e outra de 200.000 para as beirarrúas do paseo fluvial do río Miñor, para o que xa temos proxecto. Tamén está o local de ensaio de Vincios, entre outras iniciativas.
-Que retos se marca neste curso politico?
-Ante todo, a construcción de vivenda pública. No rexistro de demandantes da Consellería de Vivenda, Gondomar é un dos principais concellos con máis de 700 peticións.
-Unha das últimas polémicas centrouse na piscina.
-Esa é unha longa historia.Tiña que estar feita hai xa máis de catro anos, pero perdeuse a subvención da Xunta porque o PP non xustificou as obras. A piscina vaise facer e espero que cun custo mínimo para o concello.
-O conflicto laboral dos traballadores da recollida do lixo ameaza cunha nova folga. Que pode facer o concello?
-O problema do servizo de recollida tén dúas partes: a laboral entre a empresa e os operarios e a calidade do servizo que a empresa lle ofrece aos veciños. Esta última é a que o concello tén que negociar coa conesionaria -Geseco-. O feito de que o concello lle abone ou non á empresa o que pide non resolve o conflicto laboral. Despois de que a oposición nos impedise implantar a taxa pola recollida, a solución é difícil. O servizo custa 600.000 euros ó ano e para melloralo hai que cobrar o lixo. Nós non o facemos e por iso a Consellería de Medio Ambiente considera que non temos dereito a recibir subvencións.
-Fala da actitude da oposición do PSOE e do PP. Queda descartado por fin o pacto de goberno cos socialistas?
-A situación política etá clara a día de hoxe. En Gondomar resulta máis fácil conseguir 2 millóns de euros para o centro de saúde que 30.000 para contratar xente para limpar camiños porque os tén que aprobar o pleno. Dou por feito que é imposible o acordo e goberno, tendo en conta que os nosos hipotéticos socios pasaron límites que non se poden pasar nunca, como o do rescate do Plan Xeral da corrupción de 2006 como un documento válido e o lamentable achegamento ao PP. Hai un antes e un despois do pleno no que os dous grupos acordaron recuperar o plan. Foi entón cando o PSOE dixo por primeira vez que me votaran para alcalde, pero non para gobernar. Está claro entón que a postura é poñer paus nas rodas.
-Cre que ese achegamento entre socialistas e populares dará lugar a unha próxima moción de censura?
-Iso é algo que non nos preocupa porque non depende de nós. Nós gobernamos para os veciños de Gondomar e so é o que nos preocupa. Todo o que depende de nós faise e o que tén que pasar polo pleno, atópase co non. E sempre fichemos chamadas ó consenso. No Plan Xeral, pedímoslles opinión para negociar o prego de condicións e non quixeron facelo. O máis grave é que non queren falar do modelo urbanístico que queren para Gondomar. Só pretenden recuperar o plan feito a golpe de talonario.
-Outra das cuestións que xenera máis inquedanzas é o plan Vigo Íntegra.
-O primeiro que fixo o goberno municipal foi informar aos veciños parroquia por parroquia. Nunca ocultamos que é unha iniciativa do goberno galego, no que está o BNG, pero tamén deixamos claro que se o plan non é bo para Gondomar, oporémonos. Non fixemos coma o PP coa autoestrada, que o presentou en agosto e mantivo unha postura diante dos veciños e outra diante da Xunta. Eu estarei disposto a poñerme diante das máquinas se é preciso, como o fixen coa autoestrada cando non era nin concelleiro.
